हत्याराहरुले गर्ने चुनावमा सहभागी हुदैनौं : जानजाती अगुवाहरु

आदिबासी जानजाती अगुवाहरुले चार दलका मुख्या नेता र मन्त्रिपरिषद्का अध्यक्ष खिलाराज रेग्मीले पहिलो संविधानसभाको हत्या गरेको आरोप लगाउदै हत्याराहरुले नाटकको रुपमा गर्ने दोस्रो संविधानसभाको चुनावमा आफूहरु सहभागी नहुने बताएका छन् । 

जातीय स्वायत्तता र संघीयताका लागि संयुक्त गठबन्धनले शुक्रबार संवाद डबलीमा आयोजना गरेको ‘वर्तमान राजनीतिक संकट, निर्वाचन र निकास’ विषयक अन्तरक्रिया कार्यक्रममा बोल्दै उनीहरुले सो कुरा बताएका हुन । कार्यक्रममा बोल्दै परशुराम तामाङले गत चैत्र १ गतेको राष्ट्रपतिको आदेश र वर्तमान रेग्मी नेतृत्वको सरकारले चुनाव गर्न पनि नसक्ने यदि गरेपनि आदिबासीको हितमा नहुने बताउनुभयो । ‘रेग्मी नेतृत्वको निर्दलिय सरकार खारेज गरी नयाँ शक्ति सम्मिलित सर्वपक्षिय सरकार बनाएर नयाँ संविधानसभाका चुनावमा जानुपर्छ’ उहाँले भन्नुभयो, ‘यदि त्यो नभएमा हामीहरु चुनावमा जादैनौं, सडकमा जान्छाँैं ।’
जानजाति अगुवा तथा प्रा.डा.ओम गुरुङले चार दलिय संयन्त्र र वर्तमान रेग्मी नेतृत्वको सरकार दुवै राजनैतिक र संवैधानिक नभएको बताउदै अहिलेकै अवस्थामा गर्ने संविधानसभाको निर्वाचन हुनपनि नसक्ने र भएमा जनजातिको अधिकारलाई ग्यारेण्टी गर्न नसक्ने बताउनुभयो । चारदलिय सिण्डीकेट र कर्मचारीतन्त्र जबसम्म जारी रहन्छ तबसम्म देशले निकास नपाउने बताउँदै गुरुङले जतिसक्दो चाडो निर्दलिय सरकारको बिघटन गर्नुपर्ने बताउनुभयो ।

कार्यक्रममा बोल्दै जातीय स्वायत्तता र संघीयताका लागि संयुक्त गठबन्धनका अध्यक्ष खगेन्द्र माखिमले चैत्र १ गतेको राष्ट्रपतिको बाधाअडकाउ फुकाउ आदेशको नाममा गरिएको ‘कु’ जानजातिहरुलाई मान्य नहुने बताउदै रेग्मी नेतृत्वको सरकार खारेजी र सर्वपक्षिय सरकारको निर्माण नै आफ्नो पहिलो माग रहेको बताउनुभयो ।
अन्तरक्रियामा बोल्दै संघीय समाजवादीका उपाध्यक्ष बिजय सुब्बाले चार दलका नेता र तत्कालिन प्रधानन्याधिस र वर्तमान मन्त्रिपरिषद्का अध्यक्षले नै संविधानसभाका हत्या गरेकाले अब उनीहरुले संविधानसभाको चुनाव गर्न नसक्ने बताउनुभयो । निकासको लागि आफ्नो पार्टी तयार रहेपनि सरकारले वेवास्ता गरेको बताउनुभयो । जातिय क्षेत्रिय महासंघका केन्द्रीय सदस्य दुर्लभ पुनले चार दलका नेता र रेग्मी नेतृत्वको सरकार निरंकुश प्रकृतिको भएकाले उनीहरुको नेतृत्वमा बन्ने संविधानसभाले आदिबासी जनजातीको हितमा काम नगर्ने बताउनुभयो ।
कार्यक्रममा आदिबासी जनजातिका अध्यक्ष राज भाईकाजी, जनमुक्ति पार्टी नेपालका कोषाध्यक्ष पृथी बेघ लगायतका बक्ताहरुले सरकारले आन्दोलन पक्षका कुरा नसुनेर चार दल र सरकार अगाडी बढेको आरोप लगाउनुभयो ।